Trygge leiarar – fagdag om mellomleiaren si rolle i førebygging og handtering av mobbing

Kort om undervisningstilbodet

Som skuleleiar har du ei heilt sentral rolle i å skape eit inkluderande, trygt og godt skulemiljø for elevane. Dette arbeidet er komplekst og samansett, og kan by på krevande utfordringar – særleg når det gjeld handtering av mobbing og andre krenkingar. Då kan det vere nyttig med fagleg påfyll og å møte andre i same rolle!

Tre støttetenester har no gått saman for å tilby deg som skuleleiar i Vestland fylke eit kompetansehevande tilbod som består av ein kursdag og digital oppfølging i form av ein workshop. «Trygge leiarar – elevane sitt skulemiljø» er utvikla for å gi deg kompetanse og tryggleik i saker som handlar om elevane sitt skulemiljø.

Det er Mobbeombodet i Vestland, RVTS Vest og RKBU Vest som står bak tilbodet.

Kva lærer du?

Gjennom ein fagdag og ein digital oppfølgingsworkshop får du utvida forståing for ulike fagområde som er relevante både for førebyggjande arbeid og for handtering av saker knytt til §12 i opplæringslova. Du får òg innspel til vidare leiing av utviklingsarbeid på skulen, og tilgang til fagstoff du kan bruke saman med kollegiet ditt. Nokre stikkord om innhaldet:

• Lov og lovanvending, inkludert utfordringar med skjerpa aktivitetsplikt og barnets beste som rett, prinsipp og prosedyre
• Mobbing – omfang, fenomen og konsekvensar
• Førebygging: arbeid i personalet, bruk av tverrfaglegheit, forståing av gruppedynamikkar
• Handtering: relasjonens betydning, samtaleverktøy, rehabilitering
• Støtte til leiarrolla i komplekse mobbesaker

Målgruppe

Mellomleiarar i grunnskulen – altså avdelingsleiarar og inspektørar – sidan desse ofte har færre moglegheiter for å delta i faglege tilbod enn rektorar. Men sjølvsagt er rektorar òg hjarteleg velkomne!

Viktig å vite

Kurset er gratis.

Arrangementet blir halde i Bergen og Førde. Vel det tidspunktet og staden som passar best for deg:

• Førde: Tysdag 4. november kl. 10.00–16.00 på Rådhuset, Hafstadvegen 42
  Digital workshop: Torsdag 5. februar 2026 kl. 12.30–15.30 på Teams

• Bergen: Torsdag 13. november kl. 10.00–16.00 på Vestlandshuset, Vestre Strømkai 13
  Digital workshop: Onsdag 4. februar 2026 kl. 12.30–15.30 på Teams

Kontakt:

Beate Gauden

Spesialpedagog

beagau@helse-bergen.no

90591182

Les mer om Beate Gauden.