Tid og stad
- Når
-
- 20. mai 2026, 09:00 - 15:30
- Kvar
-
Vestre Strømkaien 13
5008 Bergen
- Påmeldingsskjema
-
Frist for påmelding: 13. mai 2026
Målgruppe
Arrangementet er for utskolerte mentorar og fagpersonar frå RVTS Vest sin nasjonale mentoropplæring og andre som arbeider i eller med mentorordningar der radikalisering og valdeleg ekstremisme er tema.
Du kan delta enten fysisk eller digitalt. Velg deltaking i påmeldingsskjema.
Innhald i dagen
Digital ekstremisme og nye valdsmønster
Nylege valdshendingar og terrorangrep, både i Noreg og internasjonalt, har i aukande grad vorte knytte til digitale miljø prega av nihilistiske verdsbilete og valdsglorifiserande innhald. Dette kjem mellom anna til uttrykk i ulike digitale økosystem og subkulturar på nett, som «No Lives Matter», «764» og «The Com». Utviklinga utfordrar etablerte forståingar av ekstremisme hos hjelparar, som tradisjonelt har vore knytte til meir tydelege ideologiske rammeverk.
Denne situasjonen reiser nye spørsmål om korleis vi skal forstå og førebyggje vald i eit meir samansett digitalt landskap og i ei stadig meir ustabil verd.
Flytande ideologiar og «salatbarekstremisme»
Hjelparar ser ei utvikling der enkelte unge i voldsorienterte nettverk rører seg meir fleksibelt mellom ulike ideologiske uttrykk, gjennom såkalla cherry-picking av narrativ og symbolikk. Ungdom kan blande haldningar og symbol frå ytre høgre, ytre venstre og ekstrem islamisme – og skifte ideologisk uttrykk over tid. Fenomenet blir ofte omtalt som salatbarekstremisme.
Dette kan tyde på at sjølve valdshandlinga i nokre tilfelle blir viktigare enn ei heilskapleg ideologisk overtyding, eller at tradisjonelle forklaringsmodellar blir opplevde som utdaterte i møte med ei moderne verd. Utviklinga aktualiserer behovet for å utforske både «nihilistisk vald» og meir tradisjonelle former for ekstremisme i eit heilskapleg førebyggingsperspektiv. Omgrepet nihilistisk blir gjerne brukt om haldningar som skildrar livet og verda som utan meining.
Fagleg samling om førebygging, avradikalisering og re-integrering
På denne mentornettverkssamlinga samlar vi fagpersonar frå praksisfeltet, forsking og erfaringskompetanse for å belyse sårbarheits- og beskyttelsesfaktorar, og samspel mellom digitale og fysiske miljø. Målet er å styrkje arbeidet med førebygging, avradikalisering og re-integrering, slik at vi kan lukkast endå betre i møte med sårbare unge.
Nevrodivergens og sårbare utviklingsforløp
Vi vil òg sjå nærare på korleis nevrodivergens* i enkelte tilfelle kan inngå i komplekse utviklingsforløp, og korleis dette kan forståast i lys av sårbarheits- og beskyttelsesfaktorar i arbeidet med førebygging av vald og ekstremisme. Tilnærminga legg vekt på ressursar og styrkjer ei forståing av nevrodivergens.
Gjennom erfaringar frå prosjekt som oppsøkande sosialt digitalt feltarbeid vil deltakarane få innblikk i korleis ein kan arbeide heilskapleg på tvers av digitale og fysiske arenaer med sårbare unge.
Risikovurdering, trendar og avsluttande panelsamtale
Vidare vil det vere eit særskilt fokus på risikovurdering knytt til vald og ekstremisme hos unge i ulike utviklingsforløp, samt oppdateringar på aktuelle trendar frå EU Knowledge Hub on Radicalisation. Dette omfattar mellom anna tematiske område som lone actor and mental health og prison and re-integration.
Dagen blir avslutta med ei panelsamtale om samanhengar mellom maskulinitetsnormer, kriminalitet og vald.
*betyr at ein har ei nevrologisk utvikling, ei hjernefunksjonering og ei åtferd som blir rekna som annleis enn det som blir definert som nevrotypisk. Døme på tilstandar som ofte fell inn under omgrepet nevrodiversitet, er autismespekterforstyrring, ADHD og Tourettes syndrom (Kjelde: Store norske leksikon).
Pris
Gratis
Målsetning
Fagleg påfyll, erfaringsdeling og nettverksbygging på tvers av profesjonar og regionar.
Program
Føredragshaldarar
David Hansen
Foto: Kriminalomsorgens høgskole og utdanningssenter (KRUS)
David Hansen (ph.d.) er professor i sikkerheit ved Kriminalomsorgens høgskole og utdanningssenter (KRUS). David har doktorgrad og hovudfag frå Universitetet i Oslo, som begge dekkjer felta radikalisering og valdeleg ekstremisme. Han har drive omfattande forsking og arbeidd med problemstillingar knytte til radikalisering, ekstremisme og terrorisme i nær 25 år, dei siste ti åra med særleg vekt på fengselsradikalisering. David har utvikla ei rekkje kurs og undervisningsopplegg, og har mellom anna hatt hovudansvaret for å etablere ei mentorordning for kriminalomsorga. Han er forfattar av fleire artiklar og ein monografi om radikalisering, valdeleg ekstremisme og internasjonal terrorisme. David er del av fleire ekspertgrupper og rådgjevande styringsorgan på ekstremismefeltet, mellom anna som medlem i panel 2: fengsel og friomsorg i EU Knowledge Hub on Prevention of Radicalisation.
Elisabeth Harnes
Anders Lundesgaard
Anders Lundesgaard er klinisk psykologspesialist med lang erfaring frå arbeid med behandling av komplekse traume hos barn, unge og vaksne, samt klinisk arbeid med flyktningar. I tillegg har Anders brei undervisningserfaring på ulike fagområde. Ved RVTS Nord har han ansvar for prosjektet ekstremisme og radikalisering, samt for prosjektet Fokus på hjelparar. Anders har òg skrive fleire bokkapittel, og den nyaste utgjevinga er kapitlet Frå individuelle og kollektive traume til valdeleg ekstremisme, skrive saman med Elisabeth Harnes i fagantologien Innsats mot ekstremisme i teori og praksis (Fagbokforlaget, 2025).
Øyvind Heen Ottesen
Øyvind Heen Ottesen er psykolog med lang erfaring frå arbeid med ungdomskriminelle ved ungdomseininga i Bjørgvin fengsel, og jobbar no som stipendiat der han forskar på risikovurderingsverktøyet YEARSS – The Youth and Emerging Adults Risk and Strength System, ei utviklingssensitiv vidareutvikling av HCR‑20 V3, ved Regionalt kompetansesenter for sikkerheits-, fengsels- og rettspsykiatri (SIFER), Helse Bergen.
Anniken Hope
Anniken Hope er prosjektleiar for digitalt oppsøkjande arbeid ved Utekontakten i Bergen. Ho leier arbeidet med å kartleggje korleis radikaliseringsprosessar og rekruttering til ekstremistiske og valdelege miljø utspelar seg på digitale plattformer. Gjennom systematisk analyse av digital retorikk, symbolbruk og rekrutteringsmetodar er målet å styrkje eige og andre instansar sitt kunnskapsgrunnlag i møte med desse utfordringane.
Gudmund Waaler
Gudmund Waaler er prest, forskar og forfattar, og har sidan 2019 vore domprost i Bergen domprosti. Fram til 2019 var han sjefsprest i Sjøforsvaret, og tidlegare prest, forskar og lærar ved Sjøkrigsskolen med doktorgrad i teologi.
Waaler har forska på korleis soldatar handterer stress, skuld og etiske utfordringar knytte til bruk av vald i internasjonale militæroperasjonar, mellom anna basert på erfaringar frå Afghanistan. I 2019 skreiv han boka Voldsbruk og livsfare (Cappelen Damm Akademisk), som dokumenterer reaksjonar og krigserfaringar hos norske og svenske soldatar frå Afghanistan.
Suhel Miah
Suhel er ein britiskbasert fagperson innan førebygging av valdeleg ekstremisme (CVE), med lang erfaring frå førstelinjearbeid med personar som er sårbare for radikalisering og ekstremisme. Arbeidet hans har omfatta eit breitt ideologisk spekter, inkludert islamistisk ekstremisme, høgreekstreme ideologiar, samansette og ustabile tankesett, samt personar med fikseringar knytte til vald, masseskytingar, attentat, stalkingåtferd og skadelege nettbaserte subkulturar.
Eit betydeleg fokus i arbeidet hans har vore støtte til nevrodivergente personar, både med og utan diagnose, med særleg spesialisering innan autisme og utvikling av effektive intervensjonsstrategiar tilpassa nevrodiverse uttrykk. Han har omfattande erfaring med individuelt oppfølgingsarbeid med både ungdom og vaksne, i tillegg til familieorienterte tiltak og arbeid med personar i risiko for å hamne i strafferettsapparatet.
Suhel har omfattande erfaring med å arbeide med personar i ulike fasar av radikaliseringsprosessar, inkludert individ identifiserte som i risiko, personar under etterforsking for terrorrelaterte forhold og personar dømde for terrorlovbrot. Dette har gitt han brei operasjonell erfaring med førebyggings-, beskyttelses- og sikringstiltak, samt oppfølging etter soning. I det daglege arbeidet har han handtert komplekse saker prega av sårbarheit, ideologi, påverknad frå nettmiljø og åtferdsrelaterte risikofaktorar.