Vidareutdanning i kronisk traumatisering og traumerelatert dissosiasjon
Foto: © Prostock-studio - stock.adobe.com
Terapeutisk arbeid med menneske som har vore utsett for langvarig traumatisering i oppveksten, krev ei anna tilnærming enn ved enklare traumetilstandar.
I samarbeid med Klinikk for Krisepsykologi arrangerer RVTS Vest ei vidareutdanning innan komplekse dissosiative lidingar. Foredragshaldarar er psykologspesialistane Arne Blindheim og Marianne Straume, som har lang klinisk erfaring frå traumefeltet. Utdanninga baserer seg på teorien om strukturell dissosiasjon av personlegdomen, og Ellert Nijenhuis si vidareutvikling av denne kalla «Enactive Trauma Therapy». Kurset går over ca. 1 år, med fire 3-dagars samlingar. Etter utdanninga er det mogleg å gå vidare til eit kurs for vidarekomne med Ellert Nijenhuis, arrangert av Klinikk for Krisepsykologi. Det er også mogleg å få rettleiing i mindre grupper i etterkant av kursa.
Utdanninga gir ei grundig innføring i traumefeltet, med særleg fokus på komplekse traumetilstandar og traumerelatert dissosiasjon. Ein vil forstå komplekse symptombilete, og korleis tidleg traumatisering fører til ei indre fragmentering i personlegdomen og vanskar med integrasjon. Ein lærer ei heilskapleg form for behandling, der mennesket blir forstått på bakgrunn av korleis vi handlar på ulike grunnleggjande behov. Kurset gir innføring i korleis symptom er erstatningshandlingar for behov som ikkje blir møtt, og korleis ein kan arbeide gradvis med å erstatte desse handlingane med meir adaptive handlingar. Vidare vil det vere fokus på korleis terapeut og pasient kan arbeide med ulike fobiar mot mentalt innhald, tilknyting og dissosiative delar. Rollespel og videoar frå behandlingstimar vil vise korleis ein kan jobbe med indre stemmer og dissosiative delar, samt korleis integrere traumatiske minne. Ein får også møte pasientar som har gått i behandling for ei kompleks dissosiativ liding. Det blir lagt vekt på gjennomgang av forsking og differensialdiagnostikk.
Vidareutdanning i kronisk traumatisering og traumerelatert dissosiasjon høver for psykologar, legar eller andre behandlarar med minimum 3-årig helse-/sosialfagleg utdanning. Ein bør ha ei klinisk arbeidssituasjon, som er tilrettelagt for terapeutiske samtalar. Kurset er først og fremst retta inn mot behandling av vaksne, men vil også ha eit barneperspektiv. Ein ser på korleis traumatisering startar og kjem til uttrykk hos barn, og vil vere nyttig for fagpersonar som arbeider med barn.
Det å arbeide med komplekse traumelidingar og dissosiasjon kan vere krevjande. Utdanninga gir eit solid grunnlag og ei tryggheit inn i dette arbeidet, og ei oppleving av å ikkje stå åleine som fagperson. Ein vil kjenne seg igjen i kvarandre sine opplevingar av utfordringar og gleder, og bli oppmuntra til eigen vekst som terapeut.
RVTS Vest starta samarbeidet med Klinikk for Krisepsykologi i 2021, og vi har hittil arrangert 2 utdanningsløp. Utdanninga har blitt sett opp også andre stader i landet, og i juni 2025 startar den i Stavanger. Det vil derfor gå litt tid før vi set opp nytt kurs i Bergen.