Septemberkonferansen 2025: Traumer og identitet

Korleis påverkar traumer vår identitetsoppleving og sjølvforståing? Kva konsekvensar har traumatiske erfaringar for korleis vi relaterer oss til andre og navigerer i verda? Og korleis kan vi som samfunn og fagpersonar betre forstå og støtte menneske som har vore utsett for traumatiserande hendingar?

– Desse spørsmåla skal Septemberkonferansen 2025 bidra til å finne svar på, seier Randi Mossefin, Elisabeth Harnes og Inger Sigfridsson, som er fagleg ansvarlege for konferansen.

Septemberkonferansen går av stabelen i Bergen den 4. - 5. september 2025.

Foto: Cristo Borrachero

Kvifor søkelys på traumer og identitet?

– Traumer kan både vere individuelle og kollektive og påverkar ikkje berre våre emosjonar, men også vår sjølvforståing, relasjonar til andre og korleis vi oppfattar verda, seier Elisabeth.

– Dei som har opplevd traumatiske hendingar kan føle at dei har vanskar med å finne ein samanhengande identitet, fortel Inger. – Iblant kan dei føle at dei har fleire «versjonar» av seg sjølv. Langvarig traumatisering kan føre til at ein byggjer sin identitet rundt overlevingsstrategiar, som å vere usynleg, tilpassingsdyktig eller i konstant beredskap.

– Samstundes kan bearbeiding av traumer også gi rom for posttraumatisk vekst, der individ finn ny meining, styrke og retning i livet, fortel Randi. – Konferansen vil belyse begge sider av dette spekteret – både utfordringane og moglegheitene knytt til identitetsutvikling etter traumer.

Førelesarar og bidragsytarar

– Konferansen vil samle ei rekkje anerkjende fagpersonar med ekspertise innan traumer, identitet og behandling. Programmet vil omfatte både forskingsbaserte føredrag og praksisnære perspektiv. I tillegg vil brukarstemmer bidra med innsikt frå eigne erfaringar, for å sikre ei heilskapleg forståing av tematikken.

Målgruppe

Septemberkonferansen rettar seg breitt mot fagpersonar og praktikarar som i sitt arbeid møter barn, unge eller vaksne med traumatiske erfaringar.

– Vi ønskjer velkomen til ein fagleg sterk og engasjerande konferanse med mål om å auke forståinga av samanhengen mellom traumer og identitet – og korleis vi best kan støtte menneske på deira veg mot heling og vekst, avsluttar Inger, Elisabeth og Randi.