Ny ressursside skal styrke kommunale psykiske helsetenester for barn og unge
Kunnskapombarn.no har lansert ei ny ressursside som skal gjere det enklare for kommunale psykiske helsetenester for barn og unge å omsetje kunnskap og nasjonale anbefalingar til praktisk arbeid.
Linda Kvalvik er RVTS sin representant i nasjonalt implementeringsteam for veileder psykisk helsearbeid barn og unge. Ho trur ressurssida vert nyttig for tilsette og leiarar i kommunale tenester.
– Eg synes det er bra at alt vert samla på ein plass. Det vil bidra til at kommunane lettare kan etablere og drifte psykiske helsetenester for barn og unge.
Foto: RVTS Vest
Nettressursen er utvikla for tilsette og leiarar i kommunale tenester, med utgangspunkt i nasjonale føringar og behov som tenestene sjølve har løfta fram.
– Det betyr noko for barn og unge kva hjelp dei møter, og når. Hjelp tidleg kan hindre at vanskar forverrar seg og at nye utviklar seg seinare. Då må hjelpa vere lett å få, og ho må vere god. Vi vil støtte tenestene i å ha låg terskel og høg kompetanse, og denne sida er ein del av den støtta.
Det seier Silje Bjørnstad Holter, spesialrådgivar og psykologspesialist ved RBUP Øst og Sør, i samband med lanseringa av ressursen på kunnskapombarn.no.
Tilpassa tenestene
Nettressursen samlar kunnskapsbaserte ressursar, råd og eksempel som kan støtte kommunane i arbeidet med å utvikle gode psykiske helsetenester for barn og unge. Målet er å gjere det enklare å orientere seg i kunnskapsgrunnlaget og ta det i bruk i det daglege arbeidet.
– Vi har vore opptekne av å lytte til kva tenestene seier at dei treng for å kunne gi gode tenester, og kva dilemma dei står i. Vi ønskjer å hjelpe tenestene med å orientere seg og gi gode eksempel på korleis vanlege utfordringar kan løysast i praksis, seier Holter.
Innhaldet er utvikla i tett dialog med tilsette og leiarar i tenestene, og fagmiljøa bak ønskjer tilbakemeldingar frå brukarar av ressursen.