Inviterer kommunane inn i nettverk mot vald og overgrep

Kommunar i Vestland vert no oppmoda til å styrke det systematiske arbeidet mot vald og overgrep ved å bli med i Nettverk for førebygging av vald og overgrep mot barn og unge.  

Foto: Sylvia Haukanes

– Erfaringane så langt viser at samarbeid, kompetansedeling og felles satsing gir kommunane betre føresetnader for å oppdage og handle tidleg, fortel Linda Kvalvik, områdeleiar ved RVTS Vest og koordinator i nettverket.

Nettverket vart etablert hausten 2024 og omfattar i dag om lag 30 kommunar i Vestland, saman med Statsforvaltaren i Vestland, RKBU Vest, RVTS Vest, Tannhelsetenestas kompetansesenter og KORUS Bergen. No inviterer nettverket fleire kommunar i Vestland til å bli med, og startar med eit uforpliktande digitalt informasjonsmøte 2. mars 2026 kl. 14.00–15.00 på Teams. 

– Vald og seksuelle overgrep mot barn og unge skjer i alle samfunnslag, seier Linda. - Kommunane har eit lovpålagt ansvar for å sikre at tilsette som møter barn og unge, har kompetanse til å fange opp signal og handle rett. Nettverket er eit konkret verkemiddel for å lukkast betre med dette ansvaret, seier ho.

Eit felles løft for tidleg oppdaging 

I tråd med nasjonal fagleg retningslinje for tidleg oppdaging av utsette barn og unge skal alle tilsette i kommunale tenester som møter barn og unge, kunne: 

• kjenne att teikn på vald og overgrep 
• snakke med barn om det dei ser og undrar seg over 
• vite kven dei skal kontakte 
• handle raskt og riktig ved mistanke 

Likevel melder mange kommunar om utfordringar med å sikre lik kompetanse på tvers av tenester og einingar. 

Gjennom nettverket får kommunane tilgang til: 

• årleg fysisk samling (i år i Bergen 18.–19. mars) 
• to til tre digitale faglege samlingar (6. mai og 21. oktober i år) 
• digitalt nettverk
• deling av gode døme og utviklingsarbeid 
• kunnskap om forsking, metodar og verktøy 
• rettleiing i implementering og systematisk arbeid 

– Målet er å byggje robuste strukturar for førebygging, ikkje berre enkeltståande tiltak, seier Linda.

Frå enkeltpersonar til system 

Ein sentral del av nettverket handlar om å gå frå personavhengig praksis til systematisk forankring i kommunen. Kommunane vert råda til å peike ut minst to faste representantar, samt ein kommunalsjef med ansvar for tenester til barn og unge.

– Desse bør ha nøkkelroller innan valdsførebygging, kompetanseutvikling eller tverrfagleg samarbeid. Til dømes kan valdskoordinator, SLT-koordinator eller BTI-koordinator vere aktuelle deltakarar, seier Linda.

– Poenget er å sikre at kunnskapen ikkje stoppar hos enkeltpersonar, men vert spreidd vidare i organisasjonen. 

Tilgang til verktøy og fagleg støtte 

Deltakarkommunane får òg støtte til å ta i bruk og implementere verktøy som «Jeg vet» og «Snakke», samt tilgang til den digitale portalen «Trygg til handling» med støttemateriell og opplæringsfilmar. Det vert også lagt til rette for å bli kjent med nettressursen Implementere.no. Kommunar som nyttar andre modellar eller program, vert oppmoda til å dele erfaringane sine med resten av nettverket. 

– Slik vert nettverket ein arena for både læring og utvikling på tvers av kommunegrenser, seier Linda.

Førebygging løner seg 

Vald og overgrep har alvorlege konsekvensar for dei som vert råka - både fysisk, psykisk og sosialt. Samstundes er det eit stort folkehelseproblem med betydelege samfunnsøkonomiske kostnader. 

Rett hjelp til rett tid kan redusere både menneskelege lidingar og langsiktige kostnader for kommunen. Arbeidet heng tett saman med folkehelsearbeid, oppvekstreform og førebyggande planar. 

– Vi håpar at fleire kommunar ser verdien av å stå saman i dette arbeidet. Ingen kommune skal måtte løyse dette åleine, avsluttar Linda.

Slik kan din kommune bli med 

Informasjonsmøtet vert halde digitalt på Teams 2. mars 2026 kl. 14.00–15.00. 

Påmelding skjer ved å sende e-post til ann-magrit.grip@statsforvalteren.no for å få tilsendt møtelenke. 

For kommunar som ønskjer å styrke kompetansen, byggje system og sikre betre vern for barn og unge, kan deltaking i nettverket vere eit viktig steg vidare. 

Relatert

Å ha eit nettverk og kvarandre er viktig! (Nyhetsartikkel)

Nettverk om førebygging av vald og overgrep (Nyhetsartikkel)