News & Events
Livet på timeplanen
I samarbeid med RKBU Vest – NORCE har vi utvikla eit program for å forebygge sjølvmord og sjølvskading i skulen.
«Livet på timeplanen» er eit opplæringsprogram for skulepersonell og skulehelsetenesta.
– På nettsida finn ein informasjon om sjølve undervisningsprogrammet som kan implementerast i skulen. I tillegg ønsker vi at nettsida vert brukt som ein ressurs for alle som er interessert eller treng meir kunnskap om forebygging av sjølvmord og sjølvskading. Vi veit at lærarar kan redde liv, men iblant treng dei meir kunnskap, seier Annie Norevik, spesialkonsulent ved RVTS Vest.
– Heile tanken med «Livet på timeplanen» er at kompetanse om forebygging av sjølvmord og sjølvskading skal ut i skulen, seier Anne Marita Milde, forskningsleder II ved RKBU Vest – NORCE. – Skulane skal eie kompetansen sjølv og ikkje vere avhengig av fagpersoner for å vite korleis fange opp og snakke med barn og unge ein er bekymra for.
Korleis kan dette programmet passe inn i ein travel skulekvardag?
– Ved implementering av «Livet på timeplanen» vil skulane få eit verktøy til å løyse utfordringar dei allereie står oppe i. Vi trur at det vil lette arbeidet. Samtidig vil elevane få ei betre skuleoppleving og ein betre kvardag, seier Annie.
– RVTS Vest får stadig henvendingar frå skular som ønsker rettleiing på saker som handlar om sjølvmord eller sjølvskading. Det kan dreie seg om venner som døyr i sjølvmord, venner som skadar seg sjølv eller har sjølvmordstankar, foreldre eller søsken som har mista livet i sjølvmord, for å nevne noko. Vi ser altså at behovet for meir kunnskap er stort, noko som var grunnlaget for at vi ville lage «Livet på timeplanen», seier Annie.
I Noreg er «Livet på timeplanen» prøvd ut på 16 barne- og ungdomsskular i eit byområde i Bergen. Ressurspersonar frå dette samarbeidet har kome med konstruktive tilbakemeldingar på nettsida, som er tatt høgde for i den siste ferdigstillinga.
Annie og Anne Marita påpeikar imidlertid at nettsida er under stadig utvikling. Det vil komme på plass fleire ressursar og verktøy. I tillegg planlegg vi å ha eit område på nettsida kor folk kan komme med tilbakemeldingar om det er noko dei saknar. Dette kan du gjere allereie no ved å ta kontakt med RVTS Vest, og merke e-posten med “Livet på timeplanen”.